Adolygiad o Drefniadau Cymunedol

Beth yw Adolygiad Cymunedol?

Mae gan Gyngor Bwrdeistref Sirol Merthyr Tudful ddyletswydd statudol, o dan Ddeddf Llywodraeth Leol (Democratiaeth) (Cymru) 2013, i fonitro’r cymunedau o fewn y sir, a threfniadau etholiadol y cymunedau hynny. Rhaid iddo hefyd gynnal ‘adolygiadau cymunedol’ pan fo’r Ddeddf yn ei gwneud yn ofynnol, neu pan ystyrir ei bod yn briodol. Wrth gyflawni’r dyletswyddau hyn, rhaid i’r Cyngor barhau i sicrhau llywodraeth leol effeithiol a chyfleus

Telerau Cyfeirio

Mae dau fath o adolygiad cymunedol y gall y Cyngor eu cynnal:

1. Adolygiad o Ffiniau Cymunedol (o dan adran 25 o’r Ddeddf)

Adolygiad o ffiniau un neu fwy o gymunedau i sicrhau eu bod yn parhau i adlewyrchu hunaniaeth yr ardal dan sylw ac yn hwyluso llywodraeth leol effeithiol a chyfleus. Gall newidiadau i ffiniau cymunedol gynnwys newidiadau i ffin cymuned bresennol, neu ddiddymu cymuned bresennol a chreu cymuned newydd.

2. Adolygiad o Drefniadau Etholiadol (o dan adran 31 o’r Ddeddf)

Mae hyn yn cynnwys edrych ar y trefniadau etholiadol o fewn cymuned benodol, sy’n golygu ystyried y sefyllfa mewn perthynas â wardiau a nifer y cynghorwyr. Wrth gynnal adolygiad o’r fath gall y Cyngor edrych ar:

• nifer yr aelodau o’r cyngor ar gyfer y gymuned;
• y rhaniad i wardiau (os yw’n briodol) at ddibenion ethol cynghorwyr;
• nifer a ffiniau unrhyw wardiau;
• enw unrhyw ward;
• nifer yr aelodau i’w hethol ar gyfer unrhyw ward;

Dywedwch eich dweud

Mae'r Cyngor wedi cyhoeddi drafft cynigion mewn ymateb i'r cam cyntaf o'r adolygiad ac rydym am glywed eich barn chi.  Dyddiad Cau: 29 Rhagfyr 2025

Rhoi eich adborth trwy anfod ebost at: democratic@merthyr.gov.uk

Mae prif bwyntiau'r cynigion wedi'u hamlinellu isod:

• Bod strwythur presennol y Ward ar gyfer Cyngor Cymuned Bedlinog a Threlewis yn parhau i fod yn ddigyfnewid.
• Bod nifer y cynrychiolwyr etholedig ar gyfer Ward Gymunedol Bedlinog yn cael ei leihau o bedwar i dri.
• Bod Ward Gymunedol Trelewis yn parhau i gael pum cynrychiolydd etholedig.
• Na fydd unrhyw newid i enw Cyngor Cymuned Bedlinog a Threlewis.