Llwyth annormal yn teithio trwy Ferthyr Tudful

Er mwyn cynorthwyo i gefnogi diogelwch ynni Prydain Fawr yn ystod y cyfnodau hynny pan fo’r galw am drydan yn ei anterth, mae Llywodraeth y Deyrnas Unedig yn gosod nifer o orsafoedd ynni o amgylch y DU. Dewiswyd Gorsaf Ynni Hirwaun fel un o’r lleoliadau allweddol ac mae angen trawsgludo tair rhan bwysig o Ddociau Casnewydd i’r safle yn Hirwaun.

Mae’r tair rhan yn cynnwys tyrbin nwy, generadur a thrawsnewidydd. Bydd pob un rhan yn cael ei chludo dros dri phenwythnos yn olynol gan ddechrau’r wythnos hon, dydd Sul 14^eg Ionawr. Mae cludo pob un o’r tair elfen yn her sylweddol o ganlyniad i’w maint a’u pwysau, a hefyd o achos materion logistaidd ar y cyd â chyfyngiadau mewn lleoliadau penodol bydd yn rhaid i’r cludiant deithio ar hyd ffyrdd Merthyr rhwng cylchfan Pentrebach a chylchfan Rhydycar yr A470. 

Bydd y cludiant yn pwyso dros 504-tunnell, bydd ei led yn 6.67m a bydd ganddo hyd anhyblyg o 57m a chyfanswm yr hyd fydd 78m. Bydd dwy lorri 44-tunnell yn gwthio ac yn tynnu ar bob pen a byddant yn teithio ar gyflymder o 5-10 milltir yr awr. Nid oes unrhyw amheuaeth mai dyma fydd y cludiant mwyaf sydd erioed wedi teithio trwy Ferthyr Tudful.

Rhwng yr oriau 11yh ddydd Sul 14^eg Ionawr a 6yb ddydd llun 15^fed Ionawr bydd y cyntaf o’r cludiannau hyn – y tyrbin nwy – yn teithio ar hyd yr A4054 rhwng cylchfan Pentrebach a chylchfan Caedraw ac yna ymlaen at yr A4102 tuag at gylchfan yr A470, Rhydycar.

Bydd system cau ffyrdd dreigl ar waith y noson honno, ac wrth iddo deithio bydd y cludiant yn cael ei hebrwng gan yr heddlu a bydd adrannau o’r ffordd yn cael eu hailagor cyn gynted a bod y cerbydau wedi gyrru heibio.

Bydd nifer o oleuadau traffig i gerddwyr, arwyddion ffyrdd a chelfi stryd eraill yn cael eu symud dros dro oherwydd bydd y cludiant yn gorhongian dros y llwybrau cerdded ar hyd y ffordd. Byddant yn cael eu gosod yn ôl yn eu lle pan fydd y broses o gludo wedi dod i ben.

Bydd parcio wedi ei wahardd ar hyd y ffyrdd hyn yn ystod y cyfnod hwn yn benodol ar Stryd Plymouth a bydd unrhyw geir sy’n parhau wedi parcio tra bod y cerbydau cludo ar eu taith yn cael eu symud gan yr heddlu.

Anfonwyd llythyron gan y cwmni cludo at y trigolion hynny fydd yn cael eu heffeithio gan y broses hon, y cwmni cludo sy’n gyfan gwbl gyfrifol am gludo’r tair rhan.

Bydd y system cau ffyrdd dreigl a’r cyfyngiadau parcio hefyd ar waith ddydd Sul 21^ain a dydd Sul 28^ain Ionawr er mwyn cludo’r generadur a’r trawsnewidydd.

Bydded hysbys y gellir gohirio’r cynlluniau hyn os ydy tymheredd y ffyrdd yn gostwng yn rhy isel. Am y wybodaeth ddiweddaraf ynghylch p’un ai fydd y broses yn mynd yn ei blaen ai peidio, ac am wybodaeth ynghylch amseroedd gweler adran newyddion gwefan y Cyngor, a fydd yn cael ei adnewyddu ddydd Sul: https://www.merthyr.gov.uk/news-and-events/?lang=cy-GB&