Cydnabod Lleoliadau Bwydo ar y Fron yn swyddogol ym Merthyr Tudful

Rydym yn falch iawn o gyhoeddi bod Y Ganolfan Blant Integredig, Canolfan Gymunedol y Gurnos ac Adeiladau Dechrau'n Deg, Treharris wedi'u dynodi'n swyddogol fel Lleoliadau Cyfeillgar i Fwydo ar y Fron!

Mae bwydo ar y fron yn cynnig nifer o fanteision i famau, babanod a'r amgylchedd. Er bod y gyfraith yn sicrhau bod gan fenywod yr hawl i fwydo ar y fron mewn unrhyw le cyhoeddus, mae llawer o famau yn dal i deimlo'n bryderus am wneud hynny. Mae hyn yn aml yn arwain at famau newydd yn aros gartref all arwain at deimladau o unigrwydd neu ddewis rhoi'r gorau i fwydo ar y fron yn gynt nag y byddent yn eu hoffi.

Trwy gydnabod Lleoliadau Cyfeillgar i Fwydo ar y Fron, rydym wedi ymrwymo i ddarparu mannau cyfforddus a phreifat i famau sy'n bwydo ar y fron pryd bynnag y mae eu hangen arnynt. Mae'r fenter hon nid yn unig yn hyrwyddo iechyd a lles mamau a'u babanod ond hefyd yn tanlinellu ein gwerthoedd craidd o gynhwysiant a chefnogaeth gymunedol.

Mae Gail Owens, bydwraig ymroddedig yn Dechrau'n Deg, yn pwysleisio manteision bwydo ar y fron:

"Mae bwydo ar y fron yn llawer mwy na bwydo'ch babi. Mae'n caniatáu amser i'r berthynas arbennig honno rhwng mam a babi ddatblygu. Trwy wneud CPI, Canolfan Gymunedol y Gurnos ac Adeiladau Dechrau'n Deg Treharris yn lleoliadau sy'n gyfeillgar i fwydo ar y fron, bydd yn galluogi mamau i deimlo eu bod yn cael eu croesawu mewn amgylchedd hamddenol i fwydo eu babi. Bydd cael mwy o leoliadau ar gyfer bwydo ar y fron ym Merthyr yn normaleiddio bwydo ar y fron a gobeithio, yn cynyddu cyfraddau gwneud hynny a fydd, yn ei dro yn rhoi canlyniadau iechyd gwell i'r genhedlaeth nesaf."

Er mwyn cefnogi mamau sy'n bwydo ar y fron, mae grŵp cymorth yn cwrdd bob Dydd Mawrth yn y Ganolfan Blant Integredig, Pentrebach. Mae'r grŵp hwn yn darparu cyfle gwych i famau rannu profiadau, derbyn cefnogaeth ac adeiladu cymuned.

Rydym yn annog pawb i rannu'r newyddion am ein Lleoliadau Cyfeillgar i Fwydo ar y Fron a chefnogi mamau yn ein cymuned. Rydym hefyd yn gwahodd y gymuned i ymweld â'r lleoliadau hyn a manteisio ar y mannau sy'n gyfeillgar i fwydo ar y fron sydd ar gael.

I gael rhagor o wybodaeth am ein Lleoliadau sy'n Gyfeillgar i Fwydo ar y Fron, cysylltwch â Jenna James ar 01685 727374 neu Jenna.James@merthyr.gov.uk.