Y gyfnewidfa Fysiau yn ennill trydedd wobr genedlaethol

Mae cyfnewidfa fysiau newydd Merthyr Tudful wedi ennill ei thrydedd wobr genedlaethol mewn tri mis.

Ar ôl derbyn dwy wobr yn yr Hydref, dewiswyd y gyfnewidfa allan o wyth ar restr fer fel enillydd IBCTC (Institiwt Brenhinol Cynllunio Trefol Cymru),am Gynllunio Rhagorol.

Disgrifiodd y beirniaid y gyfnewidfa fel ‘project esiampl o ddull cynhwysol o gynllunio, adeiladu a gweithredu a sut mae gwneud newid sylweddol i wneud system drafnidiaeth weithio.’

“Mae’r gyfnewidfa drafnidiaeth yn gyfleuster o’r radd orau ac yn ymateb i anghenion teithio pobl ym Merthyr Tudful a’r rhanbarth”.

“Mae’r adeilad yn drawiadol ac yn ddathliad arloesol o drafnidiaeth gyhoeddus fodern: model i eraill ei dilyn.”

Wedi ei ariannu gan Lywodraeth Cymru, mae’r hyb cyfan gwbl drydanol cyntaf yng Nghymru yn galluogi gwefru ar y safle, heb ddim cyflenwad nwy na thanwydd ffosil a gyda thanc i gasglu dŵr y glaw ar gyfer y toiledau.

Yn ddiweddar, mae wedi ennill y categori ‘Cynaliadwyedd’ yng Ngwobrau Rhagoriaeth mewn Adeiladu yng Nghymru 2021, gyda’r Cyngor hefyd yn ennill clod  Client y Flwyddyn yng Ngwobrau Institiwt Siartredig yr Adeiladwyr 2021 yn Llundain.

Roedd y gyfnewidfa yn un o wyth project i’w rhoi ar y rhestr fer gan IBCT Cymru fel ‘esiamplau eithriadol o sut mae cynllunwyr a chynlluniau yn cael effaith positif ar safon bywyd a chreu lleoliadau eithriadol a diogelu’r amgylchedd’.

Nododd y beirniaid bod y gyfnewidfa yn gysylltiad rhwng amrywiaeth o drafnidiaeth gan gynnwys bysiau, tacsis ac isadeiledd metro rheilffordd ar gyfer adfywio’r dyfodol a thwf canol y dref.

“Mae hyn wedi ei gyflawni gyda chynaliadwyedd yn ganolog a gan ddod a thrydaneiddio trafnidiaeth gyhoeddus a gyda’r cyfleuster ei hun yn blaenoriaethu ynni adnewyddadwy yn ogystal â nodweddion amgylcheddol eraill.”

“Roedd y dull yn esiampl ragorol o ymrwymiad cynhwysol ac ystyrlon gydag arweiniad gynllunio amlwg gan gynnwys y Comisiwn Cynllunio i Gymru.”

Cyflwynwyd y wobr i Gyfarwyddwr Cynllunio a Gwasanaethau Cymdogaeth y Cyngor Judith Jones a chynrychiolwyr o brif gontractwyr y project Morgan Sindall a Capita.

Bydd y gyfnewidfa yn cael ei enwebu yn awtomatig ar gyfer gwobrau'r DU o’r  IBCT yn Llundain y flwyddyn nesaf.