Y gyfnewidfa fysiau yn ennill prif wobr adeiladu Cymru

Mae cyfnewidfa fysiau newydd Merthyr Tudful wedi ennill ei bumed wobr bwysig mewn blwyddyn, gan gael ei enwi yn broject adeiladu gorau Cymru 2022.

Cyhoeddwyd yr orsaf fysiau £13m fel Project Adeiladu Gorau’r flwyddyn yng ngwobrau Rhagoriaeth mewn Adeiladu Cymru (RhAC), yr ail waith iddo gael ei wobrwyo gan RhAC o fewn 12 mis.

“Mae’n glir pam bod y gyfnewidfa yn ennill yr holl wobrwyon,” meddai Arweinydd y Cyngor ac Aelod y Cabinet dros Adfywio a Thai'r Cyng. Geraint Thomas. “Mae’n edrych yn anhygoel, mae’r deunyddiau o’r safon uchaf ac mae yn gyfan gwbl drydanol- does dim angen tanwydd ffosil- gyda chyfleusterau gwefru tacsis a darpariaeth ar gyfer bysiau trydan at y dyfodol.

“Rydym eisoes wedi ennill gwobrwyon am gynaliadwyedd a rhagoriaeth mewn cynllunio, ond hon yw'r brif wobr a gyflwynir yn flynyddol gan Ragoriaeth mewn Adeiladu Cymru.”

Cyflwynwyd y wobr i Swyddogion tîm Adfywio'r Cyngor Bwrdeistref Sirol, y tîm cynllunio Capita a’r adeiladwyr Morgan Sindall Construction.

Mae RhAC yn gweithio gyda phob elfen o gwmnïau adeiladu a sefydliadau yn y sector gyhoeddus a phreifat ac yn helpu’r diwydiant i wella ei berfformiad a chynnig gwell gwerth am arian i glieintiaid a’r defnyddwyr.

Mae project yr orsaf fysiau nawr yn symud i Wobrwyon Rhagoriaeth mewn Adeiladu'r DU 2022 ym mis Tachwedd.