Disgyblion Ysgol Gynradd Caedraw wedi'u henwebu ar gyfer Gwobrau Into Film 2025!

Mae disgyblion talentog yn Ysgol Gynradd Caedraw wedi cael eu henwebu ar gyfer y Categori Animeiddio Gorau (a noddir gan Walt Disney Studios Motion Pictures, UK) yng Ngwobrau Into Film eleni.

Mae GwobrauI nto Ffilm yn dathlu ac yn arddangos ehangder a dyfnder anhygoel talent ffilmio ifanc ledled y DU. Eleni, derbyniodd y Gwobrau gannoedd o geisiadau o bob cornel o'r DU.

Crëwyd 'Cae yr Arth' gan 30 o ddisgyblion 9-10 oed ac mae'r disgrifiad ffilm yn darllen:

Gan deimlo'n siomedig gan fywyd mewn dinas brysur, mae arth garedig yn baglu ar ddarn prin o natur, ac yn penderfynu ceisio ei helpu i ffynnu. Ond er gwaethaf ei ymdrechion gorau, efallai nad y ddinas fawr yw'r amgylchedd cywir...

Gellir gweld yr animeiddiad gwych yma: https://drive.google.com/file/d/1-BfR13Xkwq4sThha05NAfWxbnFQ2XzgG/view?usp=drive_link

Dywedodd Dawn Williams, Pennaeth Ysgol Gynradd Caedraw: "Mae Ysgol Gynradd Caedraw yn falch o gyhoeddi bod ein disgyblion talentog Blwyddyn 5 wedi cyrraedd y rhestr fer ar gyfer Gwobr Animeiddio Gorau Into Film ym Mhrydain Fawr. Mae eu ffilm animeiddiedig, Cae yr Arth, yn fuddugoliaeth greadigol sy'n arddangos y gorau o'r hyn y gall Cwricwlwm Cymru ei gynnig - cyfuno adrodd straeon, sgiliau digidol, gwaith tîm a dychymyg.

"Mae'r prosiect nid yn unig wedi dal sylw'r beirniaid, ond hefyd wedi tanio uchelgais yn ein disgyblion, y mae llawer ohonynt bellach yn anelu at weithio yn y diwydiannau creadigol yn y dyfodol. Mae'n foment falch nid yn unig i Caedraw, ond i Ferthyr Tudful gyfan, gan roi ein cymuned dan y chwyddwydr genedlaethol am y rhesymau cywir.

"Ni fyddai'r cyflawniad hwn wedi bod yn bosibl heb arbenigedd ac angerdd Mr Beale (HLTA) a chred ddiwyro Miss Fleet, a welodd y potensial ym mhob disgybl dan sylw.

"I ddathlu, bydd y dosbarth cyfan yn teithio i Leicester Square ar gyfer y digwyddiad carped coch, gyda chwe disgybl lwcus yn cael y cyfle unwaith mewn oes i gerdded y carped coch a chwrdd â sêr y sgrin.

"Ni allwn fod yn fwy balch o'n hanimwyr ifanc - gwir lysgenhadon creadigrwydd a phenderfyniad."

Imogen Phillips, 10 oed Cyfarwyddwr, Animeiddiwr:

"Rydw i eisiau bod yn animeiddiwr pan fyddaf yn tyfu i fyny oherwydd mae hyn wedi fy ysbrydoli. Roeddwn i'n mwynhau gwneud y dyluniad set a chyfarwyddo symudiadau Cae. Fe wnes i animeiddiad Gofod gartref ar fy mhen fy hun, a'i ddangos yn yr ysgol. Roeddwn i'n teimlo'n falch iawn. Rydyn ni'n cael cymaint o hwyl yn creu straeon allan o'n dychymyg a'u hadrodd mewn animeiddiad."

Livvie Lewis 10 oed Actor, Animeiddiwr:

"Roeddwn i wrth fy modd yn actio. Roedd yn rhaid i mi actio symudiadauac osgo Cae. Mae animeiddio yn gwneud i mi ddefnyddio fy nychymyg ac rwy'n caru adrodd straeon. Pan fyddaf yn hŷn hoffwn weithio ym maes gwneud ffilmiau."

Oliver Richards 10 oed Golygydd a Phrif Animeiddiwr:

"Y rhan anodd oedd gorfod gwneud yn siŵr nad oedden ni'n gwneud unrhyw gamgymeriadau gan ei bod yn broses fawr i fynd yn ôl a newid y fframiau. Er pan wnaethon ni gwpl o gamgymeriadau gyda llygaid Cae, roedd yn well ac roedd yn ddoniol. Mae'n dangos na allwn fod yn berffaith bob amser.  Fe wnes i fwynhau'r golygu a helpu fy nosbarth i animeiddio. Hoffwn weithio ym maes animeiddio a ffilm pan fyddaf yn tyfu i fyny."

Dywedodd y Cynghorydd Gareth Lewis, Aelod Cabinet dros Addysg: "Llongyfarchiadau mawr i'r disgyblion talentog yn Ysgol Gynradd Caedraw am eu henwebiad. Mae'n anhygoel gweld eu gwaith caled a'u creadigrwydd yn cael eu cydnabod ar lefel genedlaethol. Da iawn i'r myfyrwyr a'u hathrawon!"

Er bod y categorïau gwneud ffilmiau yng Ngwobrau Into Film yn cael eu beirniadu gan banel o arbenigwyr y diwydiant ffilm, gan gynnwys aelodau o fwrdd Into Film, mae'r Wobr Dewis Cynulleidfa (a noddir yn falch gan Universal Pictures International) yn cael ei benderfynu gan aelodau'r cyhoedd.

Mae'r bleidlais ar agor tan 13:00 ddydd Llun 2 Mehefin 2025, gyda'r enillydd yn cael ei ddatgelu yn seremoni Gwobrau Into Film ddydd Mawrth 24 Mehefin.

Dilynwch y ddolen isod i ddarllen y rheolau a'r wybodaeth ynghylch pleidleisio:

News & Views - Vote now for the 2025 Audience Choice Award - News - Into Film