CAERDYDD I GYNNAL CYMAL OLAF Y DU O TOUR DE FRANCE 2027

Mae Caerdydd wedi cael ei gadarnhau heno fel man gorffen trydydd cymal y DU o'r Tour de France 2027, wrth i'r trefnwyr ddatgelu lleoliadau cychwyn a gorffen Grand Départs hanesyddol y dynion a'r merched.

Mae'r cyhoeddiad yn tynnu sylw at rôl ganolog Cymru yn Tour de France 2027, gyda chymal tri ras y dynion yn dechrau yn y Trallwng ym Mhowys ac yn gorffen yng Nghaerdydd ddydd Sul 4 Gorffennaf 2027, gan basio trwy rai o ddringfeydd mwyaf golygfaol a heriol y rhanbarth, gan gynnwys Côte de Rhigos a Côte de Caerffili yn y cilomedrau olaf.

Mae'r cyhoeddiad yn datgelu llwybrau llawn y DU, gyda Tour de France y dynion i ddechrau yng Nghaeredin ddydd Gwener 2 Gorffennaf 2027, gyda chymal agoriadol yn mynd i Gaerliwelydd, cyn ymweld â Keswick, Lerpwl a'r Trallwng, gan orffen cymal y DU o ddigwyddiad chwaraeon blynyddol mwyaf y byd yng Nghaerdydd.

Bydd Tour de France Femmes avec Zwift 2027 yn dechrau yn Leeds ddydd Gwener 30 Gorffennaf 2027, cyn croesi’r Penwynion i Fanceinion, yna dychwelyd i Sheffield trwy ddringfeydd Ardal y Llynnoedd cyn gorffen gyda chymal arddangos yn Llundain.

I ddathlu'r foment, cafodd Castell Caerdydd a phob un o'r 9 lleoliad cychwyn a gorffen arall eu goleuo ar yr un pryd, gyda phelydr melyn wedi'i anfon i fyny i awyr y nos.

Y Cynghorydd Brent Carter, Arweinydd Cyngor Bwrdeistref Sirol Merthyr Tudful:

“Heno gwelsom lansiad swyddogol y Tour de France 2027. Ar y 4ydd o Orffennaf, 2027, byddwn yn gweld beicwyr Cymal 3 y Grand Depart, yn dechrau yn y Trallwng ac yn gorffen yng Nghaerdydd, yn reidio trwy ein Bwrdeistref Sirol ar y ffordd i’r llinell derfyn. Mae hyn yn gyffrous iawn i Ferthyr.”

Eluned Morgan, Prif Weinidog Cymru:

"Mae Cymru'n falch o gynnal cymal o'r Tour de France Grand Depart am y tro cyntaf yn 2027, a fydd yn gyfle gwych i arddangos ein tirweddau trawiadol yn un o ddigwyddiadau chwaraeon mwyaf y byd. Bydd cynnal cymal olaf ras y dynion yn y DU yn codi proffil Cymru fel cyrchfan o'r radd flaenaf i feicwyr ac ymwelwyr eraill, tra'n ysbrydoli mwy o bobl i fod yn egnïol a sicrhau manteision parhaol i Gymru."