Y Cyngor yn llongyfarch Ymddiriedolaeth Stephens and George am ennill tair gwobr nodedig

Mae’r Cyngor am longyfarch Ymddiriedolaeth Elusennol Canmlwyddiant Stephens and George, Merthyr Tudful, am ennill tair gwobr nodedig yr haf hwn.

Yn fuan ar ôl cipio Gwobr y Frenhines am Wasanaeth Gwirfoddol – yr anrhydedd uchaf a roddir i wirfoddolwyr yn y DU – mae cangen cwmni printio’r elusen hefyd wedi ennill y categori Addysg a Hyfforddiant yng Ngwobrau Elusennau 2021.

Daeth y trydydd acolâd wythnos yn ddiweddarach pan gyflwynwyd Gwobr yr Uchel Siryf i’r Ymddiriedolaeth oddi wrth Jeffrey Edwards MBE, Uchel Siryf Morgannwg Ganol, fel cydnabyddiaeth am ‘wasanaeth gwych a gwerthfawr i’r gymuned’.

A’r mis hwn, gwnaeth llyfr a ysgrifennwyd yn ystod y clo mawr gan wyth o ofalwyr ifanc o Bernardo’s Merthyr Tudful – a oedd yn cwrdd yn wythnosol ar sesiynau Zoom – ennill Prosiect Digidol Rhagorol y Flwyddyn yng Ngwobrau Academi Llwyddiant Merthyr Tudful.

Cafodd prosiect llyfrau Scarers and Carers ei ariannu gan grant a enillwyd gan yr Ymddiriedolaeth, a ffurfiodd bartneriaeth gyda Barnardo’s, yr awdur Mike Chyrch a’r arlunydd Osian Grifford i’w gynhyrchu.

Ac mae’n bosibl y bydd hyd yn oed rhagor o wobrau ar y gorwel – mae Cydlynydd Elusennol yr Ymddiriedolaeth, Helen Hughes ar restr fer Hyrwyddwyr Cymunedol Gwobrau Chwarae Teg Womenspire 2021 a gynhelir fis Medi.

Dywedodd Arweinydd y Cyngor, yr Aelod Cabinet dros Ddysgu ac Ymddiriedolwr, y Cynghorydd Lisa Mytton: “Mae’r Ymddiriedolaeth Elusennol wedi arddangos Merthyr Tudful i’r sector addysgiadol ledled y DU gyda’r tair gwobr ragorol hyn.

“Mae anrhydedd y Gwobrau Elusennol yn cydnabod amrywiaeth o fentrau’r Ymddiriedolaeth i fynd i’r afael â chyfraddau isel o lythrennedd ymhlith plant ysgol yn y fwrdeistref sirol, ac mae’n wobr deilwng am eu holl ymdrechion. Llongyfarchiadau unwaith eto!”