Ar-lein, Mae'n arbed amser
Cyflwyno Gorchymyn Gwarchod Mannau Cyhoeddus Baw Cŵn ym Merthyr Tudful
- Categorïau : Press Release
- 10 Gor 2025
Mewn cyfarfod o'r Cyngor Llawn, Ddydd Mercher 9 Gorffennaf 2025, pleidleisiodd yr Aelodau'n unfrydol o blaid cyflwyno Gorchymyn Diogelu Mannau Cyhoeddus (GDMC) ledled y fwrdeistref i frwydro yn erbyn niwsans sy'n gysylltiedig â baw cŵn mewn mannau cyhoeddus.
O 1 Medi 2025 ymlaen, bydd unrhyw un sy'n torri'r gorchymyn hwn yn cael Hysbysiad Cosb Benodedig o £100, gyda'r posibilrwydd o gael ei erlyn yn y Llys Ynadon a dirwy o hyd at £1,000.
Dywedodd y Cynghorydd Declan Sammon, Aelod Cabinet dros Drawsnewid, Llywodraethu a Phartneriaeth Gymdeithasol: "Yn 2024 fe wnaethom ymgynghori â thrigolion ar fater baw cŵn yn ein cymunedau. Fe wnaethoch chi siarad ac fe wnaethon ni wrando, ac rwy'n falch iawn bod Gorchymyn Diogelu Mannau Cyhoeddus bellach ar waith ar draws y fwrdeistref sirol.
"Mae'r mater o baeddu cŵn yn gyffredin yn y rhan fwyaf o ardaloedd, nid Merthyr Tudful yn unig, ac rydym wedi penderfynu cymryd safiad. Er ein bod yn gwybod bod y mwyafrif o berchnogion cŵn yn cymryd cyfrifoldeb ac yn glanhau ar ôl eu hanifeiliaid anwes, yn anffodus y lleiafrif sy'n achosi niwsans iechyd cyhoeddus. Rydym yn gobeithio y bydd y posibilrwydd o ddirwy ariannol, neu hyd yn oed erlyniad troseddol, yn annog perchnogion cŵn anghyfrifol i lanhau ar ôl eu ffrindiau blewog."