Gofalwyr maeth ym Merthyr Tydfil yn rhannu’r eiliadau hynny sy’n dangos datblygiad ar gyfer Pythefnos Gofal Maeth

‘Mae gallu gwneud gwahaniaeth a'u cychwyn ar daith i fywyd gwell mor werthfawr.’

Y tro cyntaf i blentyn chwerthin, trafod ei ddiwrnod, gofyn i wylio ffilm; mae'r rhain yn eiliadau y gallai llawer eu cymryd yn ganiataol, ond i ofalwyr maeth yng Nghymru, maent yn symbol o un peth, sef datblygiad.

Mae plant sydd wedi profi trawma yn aml yn datblygu ffyrdd o amddiffyn eu hunain. Gallai hyn gynnwys ymddygiadau fel pryder, tynnu yn ôl yn emosiynol, ymateb mewn ffordd ddwys neu ei chael hi’n anodd dilyn rheolau.

Mae arolwg cenedlaethol a gomisiynwyd gan Maethu Cymru wedi darganfod bod tua 80% o ofalwyr a holwyd wedi cefnogi plant wnaeth arddangos ymddygiadau fel hyn. Er y gall yr heriau hyn fod yn anodd, dywedodd hanner y gofalwyr maeth a holwyd hefyd eu bod wedi sylwi ar ddatblygiadau ystyrlon o fewn y chwe mis cyntaf.

Rhannodd gofalwyr maeth fod yr eiliadau arloesol hyn yn aml yn ymwneud â’r cyfnodau bach o gysylltiad, ond maent yn cynrychioli mwy na hynny: i blant mewn gofal, mae'n golygu eu bod wedi gwneud cynnydd, eu bod wedi dechrau teimlo'n ddiogel, eu bod wedi dechrau gwella, teimlo eu bod yn cael eu caru a’u cefnogi wedi trawma plentyndod.

O ganlyniad i brofiad, cefnogaeth ac arweiniad proffesiynol, dywedodd bron pob gofalwr (93%) eu bod bellach yn hyderus wrth ymateb i ymddygiad sy'n gysylltiedig â thrawma.

Caiff y canfyddiadau hyn eu rhyddhau cyn Pythefnos Gofal Maeth, ymgyrch flynyddol fwyaf y DU sy'n digwydd bob mis Mai i godi ymwybyddiaeth o faethu. Mae thema eleni, Dyma yw Maethu, yn amlygu profiadau go iawn gofalwyr maeth a'r rôl hanfodol y maent yn ei chwarae wrth helpu plant i deimlo'n ddiogel.

Mae Mike a Lisa o Ferthyr Tudful ymhlith 120 o ofalwyr maeth a ymatebodd i arolwg Maethu Cymru.

“Dechreuon ni ein taith maethu tua 8 mlynedd yn ôl. Drwy’r daith honno rydym wedi maethu cyfanswm o 11 o blant, pob un ohonynt yn fabanod newydd-anedig hyd at blant bach. Byddai’n gelwydd dweud bod y daith wedi bod yn rhwydd, oherwydd mae gan bob plentyn heriau gwahanol, ond mae pob un ohonynt mewn gofal am reswm – boed hynny oherwydd trawma, esgeulustod neu gamdriniaeth.

Mae gallu gwneud gwahaniaeth a’u cychwyn ar daith tuag at fywyd gwell yn hynod werth chweil, ac mae gallu bod yn rhan o greu teuluoedd newydd neu weld teuluoedd yn cael eu haduno yn gwneud ein profiad yn werth pob dim.

Mae pob plentyn rydym wedi gofalu amdano yn dod yn rhan o’n teulu, ac rydym wedi bod yn ffodus iawn i allu cynnal perthynas â’r mwyafrif ohonynt, ble bynnag y mae eu bywydau newydd.”

Dywedodd Pennaeth Gwasanaethau Plant Cyngor Bwrdeistref Sirol Merthyr Tudful: "Mae Pythefnos Gofal Maeth yn amser i daflu goleuni ar ymrwymiad eithriadol, tosturi a gwytnwch ein gofalwyr maeth yma yn Maethu Cymru, Merthyr Tudful. Bob dydd, maen nhw'n trawsnewid bywydau ifanc trwy gynnig sefydlogrwydd, dealltwriaeth a lle i berthyn. Rydym yn falch i gefnogi Ymgyrch Pythefnos Gofal Maeth y Rhwydwaith Maethu gyda’i thema eleni; 'Hyn yw Maethu', sy'n tynnu sylw at y straeon a'r profiadau go iawn sydd wrth wraidd maethu a'r rôl hanfodol y mae gofalwyr yn ei chwarae wrth lunio dyfodol mwy disglair.

Fel Pennaeth Gwasanaethau Plant, rwy'n hynod falch o'r unigolion a'r teuluoedd yn ein cymuned sy'n camu i’r adwy i gefnogi’n plant a'n pobl ifanc. Rydym yn parhau i fod yn ymrwymedig i weithio gyda'n gilydd i sicrhau bod pob plentyn ym Merthyr Tudful yn cael cyfle i dyfu i fyny mewn cartref diogel, maethlon a chariadus."

I gael gwybod mwy am ddod yn ofalwr maeth yng Nghymru, ewch i Maethu ym Merthyr Tudful | Maethu Cymru Merthyr Tudful

Y Pythefnos Gofal Maeth hwn, gallwch gwrdd â’ch tîm Maethu Cymru lleol yn:

Diwrnod Hwyl i'r Teulu ym Mharc Taf Bargoed ar 31 Mai