Dysgwyr Merthyr yn cael blas ar Gwestiynau i'r Prif Weinidog

Ymwelodd grŵp o ddysgwyr ifanc o Ferthyr Tudful â'r Senedd yn ddiweddar, lle cawsant gyfle i wylio'r Cwestiynau i'r Prif Weinidog yn fyw.

Fel rhan o daith i ddysgu rhagor am rôl y Senedd a sut mae ein cynrychiolwyr etholedig yn llunio'r polisïau sy'n effeithio ar eu bywydau bob dydd, treuliodd chwe dysgwr Twf Swyddi Cymru+ amser ym Mae Caerdydd.

Cafodd y bobl ifanc, rhwng 16 a 19 oed, o raglen hyfforddi a datblygu Whitehead-Ross Education hefyd daith o gwmpas adeilad y Senedd, cyflwyniad i rôl Aelod Seneddol, a thrafodwyd sut olwg fydd ar y system etholiadol newydd yng Nghymru y flwyddyn nesaf.

Dywedodd Brett Morgan, Rheolwr Gweithrediadau Whitehead-Ross Education:

"Rydym yn gweld nad oes gan lawer o bobl ifanc ddiddordeb mewn gwleidyddiaeth oherwydd nid ydynt yn deall y dylanwad y mae'n ei gael ar siapio ein bywydau pob dydd.

"Yn Whitehead-Ross Education, rydym yn sicrhau bod ein dysgwyr Twf Swyddi Cymru+ yn cael gwell dealltwriaeth o'r byd o'u cwmpas a sut y gallant chwarae eu rhan drwy ddeall a phleidleisio mewn etholiadau."

Mae rhaglen Twf Swyddi Cymru+ yn cynnig cyfle i bobl ifanc gael mynediad at amrywiaeth o gymwysterau, profiad gwaith a chefnogaeth i'w helpu i symud ymlaen i ddysgu pellach, prentisiaethau neu gyflogaeth.

Ychwanegodd Georgina Payne, Tiwtor Ieuenctid yn Whitehead-Ross Education:

"Mae a wnelo Twf Swyddi Cymru+ â mwy na chynnig cyfle i bobl ifanc ennill cymwysterau a phrofiad gwaith, rydym yn darparu cymorth, cyngor ac arweiniad i helpu i roi'r offer i'n dysgwyr ddatblygu sgiliau gwaith a bywyd a magu hyder."

Dywedodd Josh Davies, dysgwr 18 oed:

"Fe wnes i wir fwynhau ymweld â'r Senedd a gwylio'r Cwestiynau i'r Prif Weinidog. Rwy'n teimlo fy mod eisoes yn gwybod llawer mwy am yr hyn y mae Aelodau Seneddol yn ei wneud a sut y gall y Senedd lywio ein bywydau."

Mae Whitehead-Ross Education yn ddarpariaeth addysg oedolion a gwasanaethau cymdeithasol sy'n gweithredu chwe chanolfan hyfforddi yn ne Cymru ac yn cefnogi mwy na 3,500 o bobl bob blwyddyn. Mae eu gwaith yn cynnwys cefnogi unigolion di-waith i ennill a chadw swyddi drwy raglenni cyflogadwyedd megis Twf Swyddi Cymru+, addysg oedolion a darpariaeth gwasanaethau cymdeithasol.

Am ragor o wybodaeth, ewch i https://www.wrecltd.co.uk/