Caffi newydd Haystack ar fin agor ym Merthyr Tudful

Mae Caffi Haystack, caffi fferm a siop goffi Cymreig, ar fin agor ei ail leoliad ym Merthyr Tudful a bydd wedi'i leoli o fewn hen adeilad Becws Howfields ar y Stryd Fawr.

Mae’r perchennog, Liam Lazarus, wedi’i gefnogi’n llawn gan y Cyngor gan dderbyn cyngor, arweiniad a hefyd wedi sicrhau grant ar gyfer gosod y tu allan gan Raglen Grantiau Ffyniant Gyffredin Merthyr Tudful.

Bydd yr agoriad hynod ddisgwyliedig, a fydd yn cynnig hyd at 25 o swyddi lleol newydd, yn digwydd o fewn yr wythnosau nesaf a bydd manylion yr agoriad yn cael eu cyhoeddi wythnos cyn y dyddiad lansio. Mae Haystack wedi addo syrpreis i drigolion sy’n bwriadu ymweld ar y diwrnod agoriadol – a oedd, medden nhw, yn “rhywbeth bach i ni fynegi diolch am groesawu Caffi Haystack i’ch tref chi”.

Dechreuodd taith Haystack yn Abertawe, lle gwreiddiodd Caffi Haystack cyntaf, wedi’i ysbrydoli gan dirweddau tawel a lletygarwch cynnes ffermydd Cymru. Daeth y lleoliad yn un o ffefrynnau’r gymuned yn gyflym iawn, gan gynnig brecwastau wedi’u hysbrydoli gan gynnyrch lleol ac awyrgylch clyd sy’n teimlo fel dihangfa wledig.

Dywedodd Liam Lazarus, perchennog Caffi Haystack, “Daliodd egni bywiog ac ysbryd croesawgar Merthyr ein sylw, gan ein hysgogi i ymestyn profiad Caffi Haystack i’ch tref. Ein nod yw creu lle ym Merthyr lle gall pobl leol ymgynnull, mwynhau prydau blasus, blasu cyfoeth Coaltown Coffee a chreu atgofion.”

Ychwanegodd y Cynghorydd Michelle Symonds, Aelod Cabinet dros Adfywio, “Mae’n wych gallu croesawu busnes bywiog newydd i Ganol ein Tref sy’n tyfu’n barhaus a dymunwn y gorau iddynt ar eu menter fusnes newydd.”