Ffugiwr ar-lein yn cael ei ganfod  yn euog.

Ar 15 Mai 2024 yn Llys Ynadon Merthyr Tudful, cafwyd Lisa Hunt o Ferthyr Tudful yn euog am droseddau o dan y Ddeddf Nodau Masnach mewn perthynas â chyflenwi nwyddau ffug.

Cafwyd Lisa Hunt yn euog o saith trosedd yn ymwneud â gwerthu nwyddau ffug trwy grŵp Facebook. Daw'r euogfarn yn dilyn ymchwiliad gan Safonau Masnach Merthyr Tudful i'r gweithgareddau masnachu anghyfreithlon a gynhaliwyd gan y diffynnydd. Dywedwyd wrth y llys fod dros £11,000 wedi ei dalu i gyfrif banc Hunt, y credwyd ei fod yn ffurfio gwerthiant nwyddau ffug drwy'r grŵp Facebook “Lisa’s Genuine Reps A**”.  Roedd Hunt yn gwerthu nwyddau ffug Chanel, Nike, YSL, Stone Island, Balenciaga, Louis Vuitton a nwyddau wedi'u brandio gan Prada, fel bagiau llaw, esgidiau ymarfer, sliders, tracwisgoedd a gemwaith.  

Dedfrydwyd HUNT i 12 wythnos dan glo am bob un o'r saith trosedd gyda'r ddedfryd wedi'i gohirio am gyfnod o naw mis. Yn ogystal, cafodd orchymyn i dalu cyfraniad tuag at gostau'r erlyniad sy'n gyfanswm o £1,000 a thâl ychwanegol o £154.

Mae nwyddau ffug yn fygythiad sylweddol i ddefnyddwyr, busnesau cyfreithlon a'r economi gyfan. Mae Safonau Masnach Merthyr Tudful yn parhau i fod yn ymrwymedig i fynd i'r afael â gwerthu nwyddau ffug a byddant yn parhau i gymryd camau gorfodi cadarn yn erbyn y rhai sy'n ceisio elwa o weithgareddau anghyfreithlon o'r fath.

Dywedodd Paul Lewis, Pennaeth Gwarchod y Cyhoedd; "Rydym yn gwbl ymwybodol o'r anawsterau y mae busnesau yn eu hwynebu o gystadleuaeth annheg ac anghyfreithlon. Trwy orfodaeth gadarn ein nod yw sicrhau bod Cyngor Bwrdeistref Sirol Merthyr Tudful yn parhau i gefnogi busnesau cyfreithlon."

Dywedodd y Cynghorydd Michelle Symonds, Aelod Cabinet Adfywio, Tai a'r Cyhoedd: "Mae euogfarn Lisa Hunt yn anfon neges glir na fydd Safonau Masnach Merthyr Tudful yn goddef gwerthu nwyddau ffug yn ein cymuned. Byddwn yn parhau i weithio'n ddiflino i ddiogelu defnyddwyr a busnesau cyfreithlon rhag y niwed a achosir gan nwyddau ffug."

Atgoffir aelodau'r cyhoedd i fod yn wyliadwrus wrth brynu nwyddau, yn enwedig ar blatfformau ar-lein ac i adrodd unrhyw amheuon o weithgarwch ffug i Safonau Masnach.

I gael rhagor o wybodaeth neu i roi gwybod am weithgaredd ffug tybiedig, cysylltwch â Safonau Masnach Merthyr Tudful yn Trading.Standards@merthyr.gov.uk neu drwy Gyngor ar Bopeth ar 0808 223 1133