Rhieni yn Mabwysiadu yn y Fro, y Cymoedd a Chaerdydd yn annog mwy o deuluoedd i ystyried mabwysiadu

Mae rhieni yn VVC sydd wedi meithrin eu teuluoedd trwy fabwysiadu yn annog eraill i ystyried darparu cartref mabwysiadol sefydlog a diogel i blentyn sydd mewn gofal awdurdod lleol yng Nghymru.

Yn ystod Wythnos Genedlaethol Mabwysiadu (19 i 25 Hydref), mae Gwasanaeth Mabwysiadu Cenedlaethol Cymru yn galw ar fwy o bobl yng Nghymru i ystyried mabwysiadu pan yn cynllunio eu teuluoedd. Mae'r Gwasanaeth yn dathlu ail flwyddyn ei ymgyrch 'Mae Nawr yn Amser Da’ (Now is a Good Time), sydd wedi'i hysbrydoli gan straeon am y foment yna a newidiodd fywydau, sef pan benderfynodd rhieni ddechrau'r broses fabwysiadu.

Ledled Cymru, gwelwyd cynnydd o 10% yn nifer yr ymholiadau mabwysiadu cychwynnol dros y flwyddyn ddiwethaf – newid cadarnhaol ar ôl sawl blwyddyn o ostyngiad. Fodd bynnag, mae'r angen am deuluoedd mabwysiadol wedi cynyddu. Cynyddodd nifer y plant sy'n aros i gael eu mabwysiadu o 11%, gyda 310 o blant yn aros ar hyn o bryd.

Dywedodd y Cynghorydd Louise Minett-Vokes, Aelod o’r Cabinet dros y Gwasanaethau Cymdeithasol: "Mae'r Wythnos Fabwysiadu Genedlaethol yn gyfle i ddathlu'r effaith drawsnewidiol y gall mabwysiadu ei chael ar blant a theuluoedd. Mae pob plentyn yn haeddu'r cyfle i dyfu i fyny mewn cartref diogel, cariadus a sefydlog lle gallant ffynnu a chyrraedd eu potensial llawn.

Rydym yn hynod ddiolchgar i'n mabwysiadwyr, gofalwyr maeth a gweithwyr gofal cymdeithasol proffesiynol sy'n gwneud gwahaniaeth parhaol i fywydau plant ar draws ein cymunedau. Mae eu hymroddiad, eu tosturi a'u hymrwymiad yn help i ddarparu'r diogelwch, y berthynas a'r cyfleoedd y mae plant yn eu haeddu.

Yr Wythnos Mabwysiadu Genedlaethol hon, rwy'n annog unrhyw un sydd erioed wedi ystyried mabwysiadu i ddarganfod rhagor. Mae mabwysiadwyr yn dod o bob cefndir a gallant gynnig cartref cariadus i blentyn sydd angen un. Gyda'n gilydd, gallwn sicrhau bod mwy o blant yn cael cyfle i brofi'r sefydlogrwydd, y gofal a'r gefnogaeth y mae pob plentyn yn ei haeddu."

Dywedodd Eifion Burke, Cyfarwyddwr Gwasanaeth Mabwysiadu Cenedlaethol Cymru: "Mae Wythnos Genedlaethol Mabwysiadu yn gyfle gwych i rannu a dathlu’r llawenydd a brofir gan nifer o deuluoedd yng Nghymru drwy fabwysiadu. Wrth i mi ddechrau ar fy nhaith fel Cyfarwyddwr, hoffwn fanteisio ar y cyfle hwn i ddiolch i'r holl deuluoedd sydd wedi agor eu cartrefi, ac i annog mwy o bobl i fynegi diddordeb.

"Gall mabwysiadu gyflwyno heriau unigryw, ond mae hefyd yn daith hynod werth chweil. Rydym am i bobl wybod nad oes neb yn mabwysiadu ar eu pen eu hunain. Mae ystod eang o gymorth ar gael i blant a theuluoedd mabwysiadol ledled Cymru, gan gynnwys gwasanaethau therapiwtig, rhwydweithiau cyfoedion a chymorth yn y gymuned, i helpu teuluoedd i feithrin perthnasoedd cryf, cadarnhaol a pharhaol.

"Mae mabwysiadu yn un o'r ffyrdd mwyaf pwerus o newid dyfodol plentyn. Fy ngweledigaeth i yw y bydd Cymru yn parhau i fod ar flaen y gad wrth ddarparu gwasanaethau mabwysiadu o ansawdd uchel, gan sicrhau bod gan bob plentyn, teulu mabwysiadol a theulu geni y cymorth sydd ei angen arnynt i oresgyn heriau, ffynnu, a chyflawni eu llawn botensial."

I gael gwybod mwy am fabwysiadu yn eich ardal, ewch i www.adopt4vvc.org.