Two Tone Vapes Ltd am werthu fêp i ferch 15 oed

Yn ddiweddar, llwyddodd y Gwasanaeth Safonau Masnach yng Nghyngor Bwrdeistref Sirol Merthyr Tudful i atal gwerthu nwyddau â chyfyngiad oedran i blentyn.

Ar hyn o bryd mae cryn bryder bod pobl ifanc yn cael mynediad at gynnyrch 'anweddu'. Fel rhan o raglen weithredu sy'n mynd i'r afael â'r mater hwn, mae'r Tîm Safonau Masnach yn defnyddio gwirfoddolwyr o dan 18 oed yn rheolaidd mewn 'gweithrediadau profion prynu'.

Roedd Two Tones Vapes Ltd, 2A Victoria Street, Merthyr Tudful yn 1 o 6 safle lle ceisiodd person ifanc 15 oed brynu vape tafladwy nicotin. Gwerthodd cyfarwyddwr y cwmni, Michael Jenkins, y fêp i'r gwirfoddolwr. Fe wnaeth ymchwiliad yn dilyn y gwerthiant ganfod nad oedd digon o systemau mewn lle yn y siop er mwyn atal gwerthu anwedd i'r rhai dan 18 oed.

Ar Ionawr 24^ain 2024, plediodd Two Tone Vapes Ltd a Michael Jenkins yn euog drwy'r post i'r drosedd yn Llys Ynadon Merthyr Tudful. Gorchmynnwyd Two Tone Vapes Ltd i dalu costau a dirwyon gwerth cyfanswm o £816 a gorchmynnwyd i Michael Jenkins dalu costau a dirwyon o £616.

Dywedodd Craig Rushton, Arweinydd y Tîm Safonau Masnach, "Byddwn yn parhau i weithredu yn erbyn siopau sy'n gwerthu cynhyrchion nicotin i'r rhai dan oed.

"Mae'n erbyn y gyfraith i werthu anwedd, fêps tafladwy neu e-hylif sy'n cynnwys nicotin i unrhyw un o dan 18 oed. Cyfrifoldeb busnesau yw sicrhau bod ganddynt systemau ar waith i atal gwerthiannau o'r fath.

"Rwy'n annog unrhyw fusnes sydd angen pecyn gwybodaeth ar sut i atal gwerthu cynhyrchion nicotin dan oed i gysylltu â'r Gwasanaeth Safonau Masnach."

Dywedodd y Cynghorydd Michelle Symonds, Aelod Cabinet dros Adfywio, Tai a Gwarchod y Cyhoedd, "Rydym wedi gweld cynnydd yn nifer y bobl ifanc sy'n arbrofi gyda fêps. Nid yw'n dderbyniol gwerthu anwedd i unrhyw un dan oed.

"Rwy'n cymeradwyo'r gwaith parhaus  y mae Safonau Masnach Merthyr Tudful yn ei wneud ac rwy'n annog ein cymunedau i adrodd am unrhyw fasnachwr y credant sy'n gwerthu anwedd i'n hieuenctid."

Gallwch roi gwybod am siopau sy'n gwerthu podiau sigaréts nicotin tafladwy, e-sigaréts neu e-hylifau i'r rhai dan oed ar-lein yn Report a Trading Standards Issue | Merthyr Tydfil County Borough Council neu drwy e-bostio tstandards@merthyr.gov.uk.