CYMRU YN BAROD AR GYFER TOUR DE FRANCE WRTH I LWYBR LLAWN 2027 GAEL EI GYHOEDDI

Datgelodd y Tour de France eu llwybr llawn ar gyfer 2027, a fydd yn cynnwys cymal tri yng Nghymru, rhwng y Trallwng a Chaerdydd ddydd Sul 4 Gorffennaf.

Dyma'r cam nesaf tuag at Grands Départs hanesyddol 2027, wrth i Brydain ddod y wlad gyntaf y tu allan i Ffrainc i gynnal dechrau'r Tour de France a'r Tour de France Femmes avec Zwift yn yr un flwyddyn, wrth i'r rasys ddechrau yng Nghaeredin a Leeds yn y drefn honno.

Yn ogystal, cadarnhawyd lleoliad y sbrintiau ar bum cymal ffordd Prydain heddiw hefyd, gyda Llandrindod (Powys) yn cynnal y sbrint canolradd ar gymal tri, sydd wedi'i leoli ar yr A483 sy'n mynd mewn i'r dref sba hanesyddol. Mae map rhyngweithiol manwl o'r cymal Cymreig, sy'n dangos lleoliad y sbrint a'r wyth dringfa wedi'u categoreiddio, bellach i'w weld ar y dudalen bwrpasol hon ynghylch cymal tri.

Dywedodd y Cynghorydd Brent Carter, Arweinydd Cyngor Bwrdeistref Sirol Merthyr Tudful; "Rydym wrth ein bodd y bydd Merthyr Tudful yn chwarae rhan yn y Tour de France 2027.

"Mae hwn yn gyfle gwych i ddangos ein Bwrdeistref Sirol i gynulleidfa fyd-eang, gan dynnu sylw at ein tirweddau trawiadol, ein treftadaeth gyfoethog a'r croeso cynnes y mae ein cymunedau yn adnabyddus amdano.

"Edrychwn ymlaen at groesawu'r timau, beicwyr, criwiau cymorth ac ymwelwyr, a rhannu popeth sy'n gwneud Merthyr Tudful yn lle mor arbennig."

Bydd y Grands Départs yn gweld y Tour de France yn gwneud ei bumed ymweliad â Phrydain, ac yn cychwyn ei daith fawr tair wythnos o hyd yng Nghaeredin ddydd Gwener 2 Gorffennaf, gyda thri chymal trwy'r Alban, gogledd-orllewin Lloegr a Chymru, cyn cychwyn ar lwybr a fydd yn plygu tua’r awyr ym Morvan a'r Alpau ac yna’n arwain y beicwyr i Mende ac ymlaen i'r ornest dyngedfennol yn y Pyrenees.

Bydd pob un o'r chwe chymal o'r ddau Grands Départs yn cael eu darlledu'n fyw ar y teledu yn rhad ac am ddim yn y Deyrnas Unedig ar Five, ochr yn ochr â darllediadau byw ar TNT Sports, a fydd yn darlledu holl rasys 2027.

Am ragor o wybodaeth ac i gael gwybod y diweddaraf ynghylch y Grands Départs 2027, ewch i letourgb.com