Diwrnod Plant y Byd 2024

Mae hawliau plant wrth wraidd popeth a wnawn. Mae gennym hanes hir o gefnogi a chynnal hawliau plant yng Nghymru. Gan mlynedd ers gwneud y Datganiad o Hawliau'r Plentyn, rydym yn parhau i roi'r lle canolog i blant a phobl ifanc yn y penderfyniadau a wnawn.

Rydym am weld Cymru i bob plentyn, lle gwych i dyfu i fyny, byw a gweithio ynddo, nawr ac yn y dyfodol.

Mae hawliau yn sicrhau ein bod ni i gyd yn cael ein trin yn deg, yn gallu cyflawni ein potensial ac yn gallu codi ein llais. Dyna pam rydym yn cynnwys plant a phobl ifanc mewn penderfyniadau sy'n effeithio ar eu bywydau - gan glywed a gwrando ar eu barn, gweithredu arni, a'u grymuso i fanteisio ar eu hawliau a'u harfer.

Yn CBSMT rydym yn datblygu ein strategaeth cyfranogiad o fewn ein Bwrdd Rhianta Corfforaethol ar ei newydd wedd. Bydd y gwaith hwn yn galluogi plant a phobl ifanc, gofalwyr a rhieni i arfer eu hawl i gael eu clywed mewn penderfyniadau sy'n effeithio arnynt. Hyrwyddir eiriolaeth a’r cynnig gweithredol ar gyfer ein plant sy’n derbyn gofal er mwyn sicrhau eu bod yn gallu manteisio’n llawn ar eu hawliau. Er mwyn sicrhau bod pobl ifanc yn cael cyfleoedd ystyrlon i ddylanwadu ar benderfyniadau yn eu bywydau, rydym wedi dechrau treialu pobl ifanc i gadeirio adolygiadau plant sy'n derbyn gofal. Mae'r rhai sydd wedi digwydd wedi bod yn gadarnhaol ac mae CBSMT yn gobeithio y gellir ymestyn y gwaith hwn ar draws Merthyr Tudful a Chymru.

Gwyddom fod llawer mwy i'w wneud o hyd i sicrhau y gall plant a phobl ifanc brofi eu hawliau, a dyna pam y byddwn yn parhau i wneud popeth o fewn ein gallu i wella profiadau a chyfleoedd pob plentyn a pherson ifanc yng Nghymru.

Fel hyrwyddwr annibynnol plant yng Nghymru, mae'r Comisiynydd wedi diffinio ei gweledigaeth fel hyn: "Cymru lle mae pob plentyn a pherson ifanc yn deall eu hawliau, yn ymwybodol bod yna gomisiynydd i sefyll dros yr hawliau hynny, a'u bod yn medru derbyn cefnogaeth i gael mynediad i'r hawliau hynny.

"Mae dull gweithredu sy'n seiliedig ar hawliau plant yn golygu y bydd sefydliadau yn blaenoriaethu hawliau plant yn eu gwaith gyda phlant a theuluoedd i wella bywydau plant; rhoddir cyfleoedd i bob plentyn wneud y mwyaf o'u doniau a'u potensial; caiff pob plentyn fynediad at wybodaeth ac adnoddau i'w galluogi i fanteisio'n llawn ar eu hawliau; caiff plant gyfleoedd ystyrlon i ddylanwadu ar benderfyniadau sy'n effeithio ar eu bywydau; bydd awdurdodau ac unigolion yn atebol i blant am benderfyniadau, ac am ganlyniadau sy'n effeithio ar fywydau plant."

Dywedodd Jo Llewellyn Pennaeth y Gwasanaethau Plant: “Mae’r gwaith sy’n cael ei wneud yng ngwasanaethau plant CBSMT i hyrwyddo llais y plentyn a datblygu ein strategaeth cyfranogiad yn amlygu’r gwerth y mae CBSMT yn roi i lais y plentyn yn eu gofal”.