Ysgolion, cartrefi gofal ac adeiladau’r Cyngor yn newid i dechnoleg sy’n arbed ynni

Dros y pum mis diwethaf, uwchraddiwyd dros 4000 o ffitiadau golau aneffeithlon i oleuadau LED rhad-ar-ynni, ac mae 600 o baneli solar wedi’u gosod ar adeiladau ac ysgolion CBSMT. Mae hyn yn rhan o ymrwymiad y Cyngor i wireddu uchelgais Llywodraeth Cymru i gael y sector cyhoeddus yn Garbon Niwtral erbyn 2030.

Mae hyn oll wedi bod yn bosibl diolch i wasanaeth Re:fit Cymru, un o brosiectau Llywodraeth Cymru sy’n ceisio optimeiddio effeithlonrwydd ynni mewn eiddo, gwella cyflwr ein hysgolion, lleihau allyriadau C0₂ ac arbed arian.

Ar ben yr arbedion hyn, bydd yr adeiladau hefyd yn elwa o uwchraddiadau trydanol a mecanyddol, gan arwain at well amgylcheddau dysgu a gweithio ac amodau mwy cyfforddus. Ymhlith y gosodiadau, ceir:

• 30 x uwchraddiad i oleuadau LED
• 9 x system solar PV
• systemau gwresogi a dŵr poeth clyfar
• inswleiddio llofftydd

Yn sgil y Prosiect hwn, amcangyfrifir bod adeiladau’n arbed £136,000 ac yn allyrru 251 tunnell yn llai o garbon bob blwyddyn.

Yn ogystal â’r prosiect adeiladau, rydyn ni’n treialu’r defnydd o gerbydau trydan ac wedi gosod goleuadau stryd sy’n defnyddio ynni’n effeithlon. Rydyn ni hefyd yn gweithio gydag Arbenigwr Ynni i helpu’r Cyngor i baratoi cynllun a map ffordd er mwyn i ninnau allu chwarae rôl i gyrraedd targed 2030.

Dywedodd y Cynghorydd David Hughes, yr Aelod Portffolio dros Wasanaethau Cymdogaeth: “Mae gan bob un ohonon ni ran i’w chwarae wrth ddatgarboneiddio a gwarchod ein planed ar gyfer cenedlaethau’r dyfodol. Efallai bod y rhain yn ymddangos fel camau bychain, ond byddan nhw’n mynd yn bell tuag at wneud y Cyngor yn garbon niwtral a gwireddu targed Llywodraeth Cymru.

“Mae’r manteision ychwanegol a ddaw yn sgil gwell amodau dysgu a gweithio yn golygu nid yn unig ein bod yn gwneud y peth iawn dros yr amgylchedd, ond bydd ein pobl ifanc a’n gweithwyr yn dechrau gweld manteision y newidiadau hyn ar unwaith.

“Fel Cyngor, rydyn ni wedi ymrwymo i ddatgarboneiddio.”

Am fwy o wybodaeth, ewch i merthyr.gov.uk/council/decarbonisation