Y Gymraeg yn ganolog i'r BETP

Mae Partneriaeth Busnes ac Addysg ar y Cyd (BETP) wedi cael dau fore bendigedig yn helpu disgyblion Ysgol Gymraeg Rhyd-y-Grug i ddeall gwerth eu sgiliau Cymraeg yn y gweithle. Ar ddydd Mercher yr 17eg, cynhaliwyd ein ffair gyrfaoedd cyfrwng Cymraeg gyntaf erioed yn Ysgol Gymraeg Rhyd-y-Grug gyda chyflogwyr o Gynghrair Sgrin Cymru, Bute Energy, Dŵr Cymru, Barclays, Aspire Apprenticeships a’r Coleg, Merthyr Tudful. Siaradodd disgyblion Blwyddyn 6 â chyflogwyr o amrywiaeth eang o sectorau i ddysgu mwy am y gwahanol rolau sydd ar gael a sut y gallai eu sgiliau Cymraeg fod o fudd iddynt yn y gweithle.

Yn dilyn hyn, bu cyflogwyr yn gweithredu fel mentoriaid i’r disgyblion gan eu galluogi i gwblhau ‘Proffil Rôl Swydd’ yn canolbwyntio ar lwybr gyrfa o’u dewis. Dywedodd Mrs S Hedges, athrawes Blwyddyn 6 yn yr ysgol, fod y bore yn rhoi cyfle i ddisgyblion “ddeall sut mae’r Gymraeg yn agor drysau i’n pobl ifanc”. Ategwyd y teimlad hwn gan Nathan Jones o Dŵr Cymru a ychwanegodd, “Mae mor bwysig gwarchod a meithrin y Gymraeg yn ein gweithle fel ein bod yn gallu defnyddio ein hiaith frodorol gyda’n holl gwsmeriaid sydd eisiau ac angen y gwasanaeth hwn”. Roedd hwn yn fore hynod bwysig i’r BETP o ran codi proffil llwybrau Cymraeg a’r amrywiaeth o rolau sydd ar gael i siaradwyr Cymraeg. Diolch yn fawr iawn i'r holl gyflogwyr am wneud y bore yn gymaint o lwyddiant, diolch yn fawr!

Yna, ar ddydd Gwener yr 22ain, bu disgyblion Y Dreigiau yn Ysgol Gymraeg Rhyd-y-Grug hefyd yn ymweld â chanol tref Merthyr i annog busnesau lleol i ddefnyddio mwy o Gymraeg. Mae hyn hefyd yn agwedd bwysig ar wobr Aur y Siarter Iaith y mae’r ysgol yn gweithio tuag ati. Ymwelodd disgyblion o Flynyddoedd 2 i 6 â Specsavers, The Market Café, Hyb y Dref newydd a HSBC i ddosbarthu ymadroddion Cymraeg hawdd eu defnyddio. Buont hefyd yn helpu staff i sgwrsio â chwsmeriaid yn Gymraeg, gan hybu sgiliau Cymraeg ym Merthyr Tudful. Roedd busnesau wrth eu bodd i gael disgyblion i gymryd rhan ac yn canmol eu brwdfrydedd a'u proffesiynoldeb. Diolch yn fawr iawn i'r busnesau a gymerodd ran am wneud i'n disgyblion deimlo mor groeso!