Gwybodaeth i blant a phobl ifanc sy’n derbyn gofal

Mae “plant sy’n derbyn gofal” yn derm a ddefnyddir i ddisgrifio plant a phobl ifanc sy’n derbyn gofal gan eu Hawdurdod Lleol - a ddisgrifir yn aml fel “bod mewn gofal”. Er bod y termau hyn yn gyffredin iawn, fe’u defnyddir i gyfeirio at grŵp o blant a phobl ifanc. Fodd bynnag, byddem bob amser yn ymgynghori â phlant a phobl ifanc i ofyn sut yr hoffent inni gyfeirio atynt fel unigolion, oherwydd eu bod yn unigryw.

Mae yna lawer o resymau pam mae plant a phobl ifanc yn Derbyn Gofal. Mae pob sefyllfa yn wahanol: weithiau, nid yw rhieni yn gallu gofalu am eu plant, maent yn sâl, neu efallai bod angen gwasanaethau arbenigol arnynt na ellir mo’u darparu yn y cartref.

Os na all plentyn fyw gartref gyda’i rieni, gallai gael gofal gan berthynas/ffrind neu ofalwyr maeth neu efallai y bydd angen gwasanaethau arbenigol ar ei gyfer mewn lleoliad preswyl.

Mae adegau pan fydd angen i blant a phobl ifanc dderbyn gofal am gyfnodau byr yn unig cyn dychwelyd i fyw gyda’u teulu, ond weithiau mae’r trefniant yn parhau am gyfnod hwy.

Er mwyn rhoi help i lunio’r cynllun cywir ar gyfer y plentyn/person ifanc a’i deulu, byddwn yn cynnal asesiad a fydd yn cynnwys barn y plentyn/person ifanc a’i rieni.

Beth yw Gweithiwr Cymdeithasol?

Mae gan bob plentyn neu Berson Ifanc sy’n Derbyn Gofal weithiwr penodedig a elwir yn Weithiwr Cymdeithasol. Bydd y Gweithiwr Cymdeithasol yn gweithio gyda’r plentyn/person ifanc a’i deulu i wneud yn siŵr eu bod yn cael y cymorth sydd eu hangen ar bob un ohonynt.

• Bydd ef/hi yn ymweld â’r plentyn/person ifanc yn rheolaidd ac yn rhoi eu manylion cyswllt, fel ei bod yn hawdd cysylltu â nhw.
• Bydd y Gweithiwr Cymdeithasol yn gwrando ar farn, dymuniadau a theimladau’r plentyn/person ifanc.
• Bydd y Gweithiwr Cymdeithasol yn sicrhau bod anghenion y plentyn/person ifanc yn cael eu diwallu.
• Bydd y Gweithiwr Cymdeithasol yn esbonio’r Cynllun Gofal a Chymorth i’r plentyn/person ifanc ac yn siarad am yr hyn fydd yn digwydd yn y dyfodol.
• Bydd y Gweithiwr Cymdeithasol hefyd yn esbonio mewn ffordd sy’n addas i’r plentyn/person ifanc, y rheswm ei fod yn derbyn gofal.

Dysgwch fwy am yr hyn y mae Gweithiwr Cymdeithasol yn ei wneud yn y daflen ffeithiau a’r animeiddiad isod:

Beth yw Cynllun Gofal a Chymorth?

Bydd pob Plentyn/Person Ifanc sy’n Derbyn Gofal yn meddu ar Gynllun Gofal a Chymorth. Mae gennym ddyletswydd i lunio cynllun yn ysgrifenedig. Rhaid ysgrifennu pob cynllun mewn ymgynghoriad â’r plentyn/person ifanc, rhieni a phobl ac asiantaethau pwysig eraill ym mywyd y plentyn/person ifanc.

Mae’r Cynllun Gofal a Chymorth yn egluro’r hyn y byddwn yn ei wneud i gefnogi anghenion y plentyn/person ifanc mewn perthynas ag amser teulu, iechyd, addysg, crefydd, diwylliant a hobïau. Darperir copi ar gyfer y plentyn/person ifanc, y rhieni, y gofalwyr maeth a/neu'r gofalwyr preswyl, fel bod pawb yn gwybod am yr hyn fydd yn digwydd nesaf.

Adolygir y Cynllun yn rheolaidd gan ymgynghori â’r plentyn/person ifanc, eu rhieni a’r holl weithwyr proffesiynol sy’n ymwneud â’u gofal, er mwyn sicrhau ein bod yn parhau i gefnogi anghenion y plentyn/person ifanc.

Beth yw Cyfarfod Adolygu Plant sy’n Derbyn Gofal (CLA)?

Yn unol â’r rheoliadau, bydd Adolygiad o Gynllun Gofal a Chymorth y plentyn/person ifanc yn cael ei gynnal yn rheolaidd:

• yr un cyntaf o fewn 20 diwrnod ar ôl dechrau derbyn gofal;
• ac wedyn o fewn 3 mis;
• a phob 6 mis ar ôl hynny.

Gellir cynnal Cyfarfodydd Adolygu ychwanegol yn dibynnu ar yr amgylchiadau ond nid dyna sy’n digwydd fel arfer.

Bydd y plentyn/person ifanc, y rhieni, y gofalwyr a’r asiantaethau eraill sy’n darparu cymorth i’r teulu, gan gynnwys Gweithiwr Cymdeithasol y plentyn/person ifanc, yn cael eu gwahodd i fynychu’r Cyfarfod Adolygu.

Caiff y Cyfarfod Adolygu ei gadeirio gan rywun a elwir yn Swyddog Adolygu Annibynnol, (IRO yn fyr). Ei waith yw sicrhau bod yr Awdurdod Lleol ac asiantaethau eraill yn cyflawni’r Cynllun ar gyfer y plentyn/person ifanc, yn diwallu ei anghenion ac yn sicrhau bod hawliau’r plentyn/person ifanc yn cael eu hamddiffyn. Mae’n gweithredu’n annibynnol yn yr ystyr na fydd ganddo unrhyw beth i’w wneud â rheolaeth yr achos.

Bydd y Cyfarfod Adolygu yn trafod pob rhan o gynllun y plentyn/person ifanc (mae addysg, iechyd a lle mae’r plentyn/person ifanc yn byw bob amser yn cael eu trafod). Bydd hyn yn gwneud yn siŵr fod tasgau’n cael eu cwblhau mewn modd amserol a bod y Cynllun yn dal i fodloni’r gofynion.

Weithiau, ni fydd plant a phobl ifanc am fynychu’r cyfarfod ei hun, ond maen nhw dal eisiau dweud eu dweud ac mae ganddyn nhw’r hawl i wneud hynny. Gallant: ofyn i eiriolwr eu cynrychioli; holi am gael siarad â Chadeirydd y cyfarfod yn unig; siarad â’u Gweithiwr Cymdeithasol neu Weithiwr Proffesiynol dibynadwy arall am yr hyn y maent am ei ddweud wrth y cyfarfod; ysgrifennu llythyr; neu gofnodi rhywbeth ar Whatsapp neu apiau eraill y cyfryngau cymdeithasol.

At hynny, mae gennym Ffurflenni Ymgynghori yr ydym yn gofyn i blant a phobl ifanc, rhieni a gofalwyr maeth eu llenwi cyn iddynt ddod i’r Cyfarfod Adolygu. Dyma gyfle i bawb sôn am unrhyw beth y maen nhw’n hapus neu’n anhapus ag ef.

Adolygiad Plant sy’n Derbyn Gofal - Papurau Ymgynghori y Gofalwyr

Fy Adolygiad 0-12 Mlynedd

Adolygiad Plant sy’n Derbyn Gofal - Papurau Ymgynghori y Rhieni

Papur Ymgynghori ar gyfer Cyfarfod Adolygu Pobl Ifanc sy’n Derbyn Gofal

Gall plant a phobl ifanc ofyn am gael cynnal Cyfarfod Adolygu neu siarad â’r Swyddog Adolygu Annibynnol unrhyw bryd.

Hawliau Plant a Phobl Ifanc

Mae gan bob plentyn a pherson ifanc yng Nghymru hawliau o dan Gonfensiwn y Cenhedloedd Unedig ar Hawliau’r Plentyn. Dyma nhw:

• Mae gen i bopeth sydd ei angen arna’ i i roi’r dechrau gorau mewn bywyd i mi!
• Dwi’n cael dweud fy nweud ac yn cael fy nhrin â pharch.
• Dwi’n gallu cymryd rhan, mwynhau dysgu a chael yr addysg orau bosibl.
• Mae fy nghartref yn lle diogel i fyw ynddo ac mae gen i lawer o bethau i’w gwneud sy’n agos at y lle dwi’n byw.
• Mae gen i fywyd iach ym mhob agwedd, gan gynnwys iechyd emosiynol, a dwi’n cael fy nghadw’n ddiogel rhag niwed neu gamdriniaeth.
• Dydw i ddim yn gorfod byw mewn tlodi ac mae gennym ddigon o arian i gael y pethau sydd eu hangen arnom ni.
• Dwi’n mwynhau chwarae ac yn cael cyfleoedd i fwynhau chwaraeon a gweithgareddau diwylliannol efo fy ffrindiau.

Mae’n rhaid i Lywodraeth Cymru ystyried yr hawliau hyn bob tro y byddan nhw’n gwneud penderfyniad. Yng Nghymru, mae gennym Gomisiynydd Plant a’i waith yw dwyn y Llywodraeth i gyfrif am hawliau plant a phobl ifanc.

I gael rhagor o wybodaeth gweler y dolenni isod:

Hawliau Plant: Gwybodaeth i Blant | LLYW.CYMRU

Hafan - Comisiynydd Plant Cymru (complantcymru.org.uk)

Gwasanaeth Eiriolaeth Ieuenctid Cenedlaethol (NYAS) – gall plant a phobl ifanc gyfeirio’u hunain at eiriolaeth drwy ffonio’r rhif llinell am ddim neu ddilyn y ddolen isod:

Llinell Gymorth am Ddim

0808 808 1001

 Y Gwasanaeth Eiriolaeth Ieuenctid Cenedlaethol | NYAS

Sut beth yw Gofal Maeth?

Dysgwch fwy am hyn ar ein Tudalen Maethu sydd ar gael isod.

maethu cymru